Sálfræðingur og doktor í lífeðlislegri sálfræði

Ég er sálfræðingur með doktorsgráðu í lífeðlislegri sálfræði og starfa á mótum taugakerfis, hjarta og leiðtogafærni. Vinna mín beinist að því hvernig innra lífeðlislegt ástand mótar hugsun, tilfinningar, ákvarðanatöku og tengsl, og hvernig það hefur áhrif á það hvernig við leiðum, störfum og lifum.

Ég kenni leiðtogum, teymum og einstaklingum að leiða með taugakerfi í jafnvægi og opnu hjarta, að byggja upp innri stöðugleika sem styður skýra hugsun, tilfinningalegt jafnvægi, þrautseigju og mannlega tengingu, jafnvel undir álagi. Innra ástand okkar er ekki einkamál; það birtist í rödd, nærveru og hegðun og hefur áhrif á taugakerfi annarra. Þegar við lærum að hafa áhrif á eigið lífeðlislegt ástand bætum við ekki aðeins eigin líðan og frammistöðu, heldur mótum einnig tilfinningalegt andrúmsloftið í kringum okkur. Þannig verður sjálfsstjórnun að leiðtogafærni.

Vinna mín byggir á rannsóknum úr lífeðlislegri sálfræði og taugavísindum, og ég er virk í rannsóknum á sviði lífeðlislegrar sálfræði, með áherslu á hjartsláttartíðnibreytileika (HRV), stjórnun taugakerfis, seiglu og hugræna frammistöðu undir álagi. Doktorsrannsókn mín beindist að því hvernig þjálfun í lífeðlislegri stjórnun getur styrkt seiglu og frammistöðu í krefjandi starfsaðstæðum. Ég birti og kynni reglulega rannsóknir á alþjóðlegum vettvangi á sviði hagnýtrar lífeðlislegrar sálfræði.

Starfsferill minn spannar klínísk störf, lýðheilsu og stefnumótun í kerfum og aðstæðum þar sem álag er raunverulegt og ákvarðanir hafa áhrif. Ég hef m.a. gegnt leiðtogahlutverki í sálfræðiþjónustu innan heilsugæslunnar, verið yfirsálfræðingur á heilbrigðisstofnun, sálfræðingur hjá lögreglunni, sérfræðingur í lýðheilsu innan heilbrigðisráðuneytisins og sérfræðingur í geðrækt hjá embætti landlæknis. Þessi reynsla hefur mótað djúpan skilning minn á seiglu, endurheimt og sjálfbærri frammistöðu í flóknum kerfum.

Ég miðla þessari þekkingu bæði innan fagheimsins og til almennings, meðal annars á alþjóðlegum ráðstefnum í lífeðlislegri sálfræði og í TEDx erindi þar sem ég fjalla um hvernig stjórnun á eigin innra ástandi styður ekki aðeins okkar eigin vellíðan heldur hefur einnig jákvæð áhrif á fólkið og umhverfið í kringum okkur.